抒情文，既唔洗死背例子，又可以創作屬於自己嘅故事，無咁多結構上嘅限制，係唔少同學仔嘅不二之選。不過，相信作開抒情文嘅你一定會俾人話過，「文章立意吾夠深刻」，「反思平庸」，究竟點先到可以寫出一篇富有深度嘅文章，令評卷員回味無窮呢？今日就等小編分享下立意最重要嘅三個步驟，上星無難度！

 

1.睇清楚題目提供左啲咩材料

審題其實係立意前最重要嘅一步，雖說寫抒情文自由度大，但係好多時候題目嘅關鍵字已經暗示左寫作方向。喺落筆之前一定要認真用幾分鐘時間，搵出題目嘅關鍵字眼，有助同學仔後面立意唔會離題！就要2020年文憑試中文卷二第一題為例

 

在我認識的人當中，他最能體現「嚴以律己，寬以待人」的美德。試寫作文章一篇，描述這位人物的言行。

 

呢條題目嘅關鍵字有：「最能」、「描述」。

 

好多同學會誤以為，所謂關鍵字就係題目嘅重點，如：「嚴以律己，寬以待人」。其實咁樣做對於審題係冇太大作用㗎，真正嘅關鍵字係一啲可以體現題目方向嘅字眼，喺立意嘅時候就唔會迷失左方向啦！

 

2.確定反思對象同方向

一篇完整嘅立意往往針對一個主題，例如：親情，友情，個人品德，待人處事等。喺呢個部份，同學仔可能會發現大家寫嘅方向都差唔多，文章開始趨向平庸以及大衆化。秘訣其實係主題背後嘅情感，而非思考本身。要謹記，抒情文之所以為抒情文，在於所表達嘅感情，切忌說教式嘅反思。

 

同樣以2020年卷二嘅題目為例，我哋得知題目要求考針對一人，描寫其行為特徵，突出其「嚴以律己，寬以待人」嘅性格特點。假如以親情方向為目標，係要表達對該對象嘅感激之情/思念之意/仰慕之心？呢部份往往係考生們嘅分水嶺，高下之分。喺寫文嘅同時，提醒自己每段以唔同嘅方式表達該情感變化，要有意識咁扣緊主題。

 

3.運用逆向思維

評卷員一日可能要批改不下百篇文章，毫無新意嘅文章會瞬間降低評卷員對文章嘅整體印象。同學仔喺情感同故事情節上善用逆向思考，有助昇華文章。

 

繼續以2020年卷二為例，先以正常思維構思文章立意，同學仔可能會寫爺爺一生都徹「嚴以律己，寬以待人」，以唔同嘅角度描寫爺爺嘅為人，寫作者嘅感激之情。

若同學仔以逆向思維構思，可以先寫作者一直都對爺爺有所誤解，以插敘嘅手法回憶以往爺爺嘅言行，後來明白爺爺係「嚴以律己，寬以待人」，帶出作者嘅愧疚之情，同時間接表達對爺爺嘅欣賞。

 

同學仔不妨不時練習審題，在腦海中構思文章嘅立意，訓練自己逆向思維嘅能力，喺正式考試嘅時候就更得心應手！